| | Chast goddesse wel wotist thou that I | |
| | Desire to be amaiden al my lyf | |
| | Ne neuer wol I be loue ne wyf | |
| | I am thou wotist yet of thy company | |
| 1450 | Amaiden and loue huntyng and venory | |
| | And forto walkyn in the wodis wilde | |
| | And not to be a wyf and be with childe | |
| | Nought wil I knowe no companye of man | |
| | Now help me lady sithnes thou may and can | |
| 1455 | For the thre fourmes that thou hast in the | |
| | And Palamon that hath suche loue to me | |
| | And eke arcite that loueth me so sore | |
| | This grace I pray the withouten more | |
| | As sende loue and pees betwix hem two | |
| 1460 | And fro me turne awey hert hertis so | |
| | That al hir hote loue and her desire | |
| | And al her besy turment and al hir fire | |
| | Be queynt or turned in another place | |
| | And if so be thou wilt do me no grace | |
| 1465 | Or yf my destenye be shapen so | |
| | That I shal nedis haue on of hem two | |
| | As send me hym that most desireth me | |
| | Beholde goddesse my clene chastite | |
| | The bittir teris that on my chekis falle | |
| 1470 | Sithnes thou art a maide & keper of vs alle | |
| | My maidenhed thou kepe & wel conserue | |
| | And whiles I lyue a maiden wil I the serue | |
| | Thise firis brenne vp on the auters cleer | |
| | While Emely was thus in hir praiere | |
