| | For that sorow that was in thy hert | |
| | Haue rowthe as wel vp on my peynys smert | |
| 1535 | I am yong and vnkonnynge as thou wost | |
| | And as I trowe with loue offendid most | |
| | Than euer was ony liuys creature | |
| | For she that doth me al this wo endure | |
| | Ne recchith neuer whether I synke or flete | |
| 1540 | And wel I woot or she me mercy hete | |
| | I muste with strengthe wynne here in place | |
| | And wel I wot withoute help and grace | |
| | Of the may not my strengthe a vayle | |
| | Than help me lord to morow in my batayle | |
| 1545 | For that fyre that whilom brent the | |
| | As wel as that fyre now brennyth me | |
| | And do that I to morow haue victory | |
| | Myn the trauayl and thyn be the glory | |
| | Thy souereyn tempyl wil I most honouren | |
| 1550 | Of ony place alwey and most labowryn | |
| | In thy plesaunce and in thy craftis stronge | |
| | And in thy tempyl I wil my baner honge | |
| | And alle the armys of my companye | |
| | And euermore vntyl that I dye | |
| 1555 | Eterne fyre I wol beforn the fynde | |
| | And eke to this avowe I wil me bynde | |
| | My berd my heer that hangith long adoun | |
| | That neuer yet felt offensioun | |
| | Of rasour ne of shere I wil the yeue | |
| 1560 | And be thy trewe seruaunt whilis I lyue | |
| | Now lord haue rowthe vp on my sorowis sore | |
