| | Yeue me the victory I axe nomore | |
| | The prayer stynt & arcite the strong | |
| | The ringis that on the tempil dore hong | |
| 1565 | And eke the dores clatered so faste | |
| | Of whiche arcite somwhat hym agaste | |
| | The firis brende vp on the auters bright | |
| | That it gan al the tempil forto light | |
| | A sote smel anon the ground vp yaf | |
| 1570 | And arcita anon his hond vp gaf | |
| | And more encence in to the fire caste | |
| | With other rightis and at the laste | |
| | The statu of marce began his hanberk ringe | |
| | And with that sown he herde a mornynge | |
| 1575 | Ful lowe and dym and sayde victory | |
| | For whiche he yaf to marce honour and glory | |
| | And thus with ioye and hope wel to fare | |
| | Arcite anon to his Inne is fare | |
| | As fayn as fowle is of the bright sonne | |
| 1580 | And right anon suche strif is there begonne | |
| | For that grauntynge in heuene aboue | |
| | Betwix venus goddesse of loue | |
| | And Marce the sterne god armypotent | |
| | That Iubiter was fayn it to stynte | |
| 1585 | Tyl that the Pale Saturnus the colde | |
| | That knew so many of auenturis olde | |
| | Fond in his experience and art | |
| | That he ful sone hath plesed euery part | |
| | As soth is said . eld hath gret auauntage | |
| 1590 | In eld is bothe wisedom and vsage | |
