| | Men may the olde out renne but not out rede | |
| | Saturn anon to stynte strif and drede | |
| | Al be it that it is ayens his kynde | |
| | Of al this strif he can remedies fynde | |
| 1595 | My dere doughter dere quod Saturne | |
| | My cours that hath so wyde forto turne | |
| | Hath more power than hath ony man | |
| | Myn is the drenchynge in the see so wan | |
| | Myn is the pryson in the derk cote | |
| 1600 | Myn is the strangeling & hangyng be the throte | |
| | The murmur and the chorlis rebellynge | |
| | The groynynge and the pryue enpoysonynge | |
| | I do vengeaunce and pleyn correction | |
| | Whiles I dwelle in the signe of the lion | |
| 1605 | Myn is the ruyne of the high halles | |
| | The fallyng of the touris and of the wallis | |
| | Vp on the mynour and vp on the Carpenter | |
| | I slough Sampson shakynge the pyler | |
| | And myne ben the maladyes colde | |
| 1610 | The grete treson and the castis olde | |
| | My lokynge is the fader of pestelence | |
| | Now wepe nomore I shal do my diligence | |
| | That Palamon that is thyn owen knyght | |
| | Shal haue his lady as thou hym behight | |
| 1615 | And marce shal kepe his knight yet natheles | |
| | Betwix you ther muste be somtyme pees | |
| | Al be ye not of on complexion | |
| | That causith alday suche diuision | |
| | I am thyn al redy at thy wille | |
