| 1680 | Considered that it were destruction | |
| | To gentil blood to fightyn in this wyse | |
| | Of mortal bataille now in this empryse | |
| | Wherfore to scape that they sholde not dye | |
| | He wil his firste purpos modifye | |
| 1685 | Noman therfore on peyne of losyng his lif | |
| | No maner shot . ne pollax . ne short knyf | |
| | Vnto the listis brynge . ne thider sende | |
| | Ne short swerd forto styke bytende | |
| | Ne noman to drawe ne bere be his syde | |
| 1690 | Ne noman shal to his felaw ryde | |
| | Foynyng if hym list on fote hym self to wreke | |
| | Ne noman so hardy this ordenaunce forto breke | |
| | And he that is at myschief shal be take | |
| | And not slayn . but brought to the stake | |
| 1695 | That shal be ordeyned on eyther syde | |
| | But thider he shal be force and there abyde | |
| | And if so falle the cheefteyn be take | |
| | On either syde or ellis sleth his make | |
| | No lenger shal the turneyyng laste | |
| 1700 | God spede you goth on and leith on faste | |
| | With longe swerdis & maces fight your fil | |
| | Goth now your wey this is the lordis wil | |
| | The vois of the pepyl towchid heuene | |
| | So lowde cryde they with mylde steuen | |
| 1705 | God saue suche a lord that is so good | |
| | He willith no destruction of blood | |
| | Vp goth the trumpis and the melodye | |
| | And to the listis ridith this companye | |
