| | Yemen on fote and knaues many on | |
| | With shorte staues thicke as they may gon | |
| | Pipis trompis naconers and clarions | |
| | That in the bataylle blew blody sowns | |
| 1655 | The paleys ful of pepyl vp an doun | |
| | Here thre here . ten holdyng her question | |
| | Demynge of the theban knyghtis two | |
| | Sum sayde thus some sayde it shal be so | |
| | Some held with hym with the blak berd | |
| 1660 | Som with the ballyd . some with þe thicke herid | |
| | Some sayde he loked grym and he wolde fighte | |
| | He hath a sparth of . xx . pounde of wighte | |
| | Thus was the halle ful of demenynge | |
| | Longe aftir that the sonne gan to spryng | |
| 1665 | The grete Theseus that of his sleep is wakyd | |
| | With mynstralsie & noyse that was maked | |
| | Held yet the chambir of his paleys riche | |
| | Tyl that the theban knyghtis bothe y liche | |
| | I honoured were and in to the Paleys fet | |
| 1670 | Duke Theseus is at the wyndow set | |
| | Araid as he were god in trone | |
| | The pepyl preced thiderward ful sone | |
| | Hym forto seen and his high reuerence | |
| | And eke to harkyn his hest and his sentence | |
| 1675 | An herowde on a skaffold made an O | |
| | Tyl that the noyse of the pepyl was do | |
| | And whan he saw the pepyl of noyse al stille | |
| | Thus shewde he the mighty dukes wille | |
| | The lord hath of high discression | |
