| | That in her noumbre gile was ther noon | |
| | Tho were the yatis shyt and cride was loude | |
| 1740 | Doth now your deuer yong knyghtis proude | |
| | The herowdes lefte hir prikyng vp and doun | |
| | Now ryngyn trompis lowde and clarioun | |
| | Ther is nomore to sey but est and west | |
| | In goth the speris ful sadly in the rest | |
| | Ther shyueryn shaftis vp on sheldis thikke | |
| | He felith thorow the hert spon the prik | |
| | Vp springith speris twenty foot on highte | |
| 1750 | Out goth the swerdis as the siluer brighte | |
| | The helmes therto hewen and to shrede | |
| | Out brestith the blood with stoute stremys rede | |
| | With mighty maces the bonys they to brest | |
| | And thorow the thickest they throng & threst | |
| 1755 | There stombelyn stedis strong & doun falle | |
| | He rollith vnder foot as doth a balle | |
| | He foyneth on his foot with his trunchon | |
| | And he hurte lith with his hors adoun | |
| | He thorow the body is hurt and sithnes take | |
| 1760 | Magre his heed and brought to the stake | |
| | As forward was right there he moste abide | |
| | Anothir led is on that other side | |
| | And somtyme doth hem Theseus to reste | |
| | Hem forto refresshe and drynke yf theym liste | |
| 1765 | Ful ofte aday haue the thebans two | |
| | To geder y met and wrought eyther wo | |
| | Vnhorsid hath eche other of hem tweye | |
| | Ther is no tiger in the vale of galefeye | |
