| | When that her whelpe is stole when it is lite | |
| 1770 | So cruel on the hunte as is arcite | |
| | For ielous herte vp on this Palamon | |
| | Ne in belmarie ther is non so fel alioun | |
| | That huntid is or for angir wood | |
| | Ne of his pray desirith so the blood | |
| 1775 | As Palamon to sle his foo arcite | |
| | The ielous strokis on her helmys bite | |
| | Out renneth blood on bothe her sides reed | |
| | Som tyme an ende ther is of euery dede | |
| | For or the sonne out of the west went | |
| 1780 | The stronge kyng Emetrus gan hent | |
| | This Palamon as he fought with arcite | |
| | And made his sweerd depe in his flesh bite | |
| | And by the force of twenty was he take | |
| | And yolden and drawe to the stake | |
| 1785 | And in the rescous of this Palamon | |
| | The stronge kyng Ligurge is born a doun | |
| | And kyng Emetrus for al his strengthe | |
| | Is born out of his sadil a swerdis lengthe | |
| | So hitte hym Palamon or he were ytake | |
| 1790 | But al for nought he was brought to the stake | |
| | His hardy herte myghte hym helpe nought | |
| | He muste abyde when he was caught | |
| | Be force and eke be composicion | |
| | Who soroweth now but this Palamon | |
| 1795 | That muste nomore go ayen to fight | |
| | And whan that Theseus hadde seye that sight | |
| | He cryde than ho . nomore for it is done | |
