| | And leet anon to hacke and to hewe | |
| | The okis olde and ley hem on a rewe | |
| | In culpyns wel araid forto brenne | |
| | His officers with swift feet they renne | |
| 2005 | And riden anon at his comaundement | |
| | And aftir this Theseus hath sent | |
| | Aftir a bere and he it ouer sprad | |
| | With clothis of gold the richest that he had | |
| | And of the same he clothid arcite | |
| 2010 | Vp on his hondis his glouys white | |
| | And on his hed a crowne of laurer grene | |
| | And in his hond a swerd ful bright & shene | |
| | He layde hym bare the visage on the bere | |
| | Ther with he wepte that pyte was to here | |
| 2015 | And for the pepyl sholde se hym alle | |
| | Whan it was day . he brought hym in to the halle | |
| | That thorough the cryynge and the sown | |
| | Tho cam this woful theban Palamoun | |
| | With floterid berd . and ruggid asshy heris | |
| 2020 | In clothis blak dropped al with teris | |
| | And passinge other of weping Emelye | |
| | The rewfullest of al the companye | |
| | In as muche the seruise shuld be | |
| | The more nobyl and riche in his degre | |
| 2025 | Duke Theseus leet thre stedis forth brynge | |
| | That trappid were in steel al gliterynge | |
| | And couered with the armys of arcite | |
| | Vp on the stedis grete and white | |
| | Ther satyn folk of whiche one bare his sheld | |
