| 2030 | Anothir a spere vpon his hondis held | |
| | The thridde baar with hym his bowe turkeys | |
| | Of brend gold was the caas and the harneys | |
| | And riden forth a paas with sorouful chere | |
| | Toward the groue as ye shul aftir here | |
| | With slak paas and yen rede and weet | |
| | Thorow out the cite be the maister strete | |
| | That spred was al with blac wonder hye | |
| 2040 | Right of the same is the strete I wrye | |
| | Op on the right hond wente olde Egeus | |
| | And on that othir side duke Theseus | |
| | With vesselis of gold in hir hond ful fyne | |
| | And ful of hony mylk . blood and wyne | |
| 2045 | Eke Palamon with ful greet companye | |
| | And aftir that cam woful Emelye | |
| | With fire in hond as was that tyme the gyse | |
| | To do the office and the funeral seruise | |
| | High labour and ful greet apparelynge | |
| 2050 | Was at the seruise of that fire makynge | |
| | That with his grene top the heuen raughte | |
| | And twenty fadom of brede the armys straughte | |
| | This is to say the bowes were so brood | |
| | Of straw first was layd meny a lood | |
| 2055 | But how the fire was made vp an heyghte | |
| | And as to telle you what the treys highte | |
| | As ok firre birch / ash / alder holm popeler | |
| | Mapil thorn / bech / aspe / box chesteyn lynd / laurer | |
| | Wilow / elme / plane hasil and whipultre | |
| 2060 | How they were fellid shal not be told for me | |
