| | For that no cry her mayde myghte hym calle | |
| | He nolde answer for no thing myghte falle | |
| | This passith forth al that satirday | |
| | That Nicholas stille in his chambir lay | |
| 235 | And eet or sleep or dede what hym list | |
| | Tyl sonday that the sonne goth to rest | |
| | This sely Carpenter hath gret meruayl | |
| | Of Nicholas or what hym myghte ayl | |
| | And sayde I am a doute be seint Thomas | |
| 240 | It stondith not aright with Nicholas | |
| | Got shilde that he deyde sodenly | |
| | This worlde is now ful tikyl sikirly | |
| | I sawe a corps to day bore to chirche | |
| | That now amonday last I say hym wirche | |
| 245 | Go vp quod he vnto his knaue anon | |
| | Clepe at the dore or knocke with aston | |
| | Loke how it is and tel me boldely | |
| | This knaue goth hym vp ful sturdely | |
| | And at the chambir dore whil that he stod | |
| 250 | He cryde and knokked as he were wood | |
| | What how what dost yow Maistir Nicholay | |
| | How may ye slepen al the long day | |
| | But al for nought he herde not a word | |
| | An hool ful lowe he fond vp on a borde | |
| 255 | There as the cat was wont yn forto crepe | |
| | And at the hole he loked yn ful depe | |
| | Tyl at the last he hadde of hym a sighte | |
| | This Nicholas lay gapyng euyr vpright | |
| | As he hadde loked on the new mone | |
