| 260 | A doun he goth and tellith his maister sone | |
| | In what aray he saw this ilke man | |
| | This Carpenter to blisse hym began | |
| | And sayde help vs saint frideswyde | |
| | Aman woot litil what hym shal betyde | |
| 265 | This man is fallen with his astronomye | |
| | In som woodnesse or in sum agonye | |
| | I thoughte ay wel how it sholde be | |
| | Men sholde not knowe of goddis pryuyte | |
| | I blissed be alwey alewd man | |
| 270 | That nought but only his beleue can | |
| | So ferd anothir clerk with astronomye | |
| | He walked in the feldis forto prye | |
| | Vpon the sterrys what ther sholde be falle | |
| | Tyl he was in a marlepit y falle | |
| 275 | He saw not that but yet be saint Thomas | |
| | Me rewith sore of hend Nicholas | |
| | He shal be ratyd of his studyyng | |
| | If that I may be Ihesu heuyn kyng | |
| | Gete me a staf that I may vnderspore | |
| 280 | Whyle that thow Robyn heuyst of the dore | |
| | He shal out of this studyyng as I gesse | |
| | And to the chambir dore he gan hym dresse | |
| | His knaue was a strong chorle for the nonys | |
| | And by the hasp he haf it vp at onys | |
| 285 | Into the floor the dore fyl anon | |
| | This Nicholas sat as stille as ony ston | |
| | And euyr gaped vpward in the eyr | |
| | This Carpenter wende that he hadde be in despeyr | |
