| | And hente hym be the sholdris mightely | |
| 290 | And shook hym herde and cryde spetously | |
| | What Nicholay what how looke adoun | |
| | Awake and thynk on cristis passion | |
| | I crouche the fro eluys and fro wightis | |
| | Therwith the nyghtspel sayde he anon rightis | |
| 295 | On four haluys on the hous aboute | |
| | And on the thresshold & on the dore withoute | |
| | Ihesu crist and seynt Benedight | |
| | Blisse this hous from euery wickyd wyght | |
| | For nyghtis werry the wight pater noster | |
| 300 | Where wonnest thow saint Petris suster | |
| | And at the laste this hend Nicholas | |
| | Gan for to sighe sore and sayde alas | |
| | Shal al the worlde be lost eftsones now | |
| | This carpenter answerd what says thou now | |
| 305 | What thynk on god as we do men that swynke | |
| | This Nicholas answerde fette me drynke | |
| | And aftir wil y speke in to the priuyte | |
| | Of certayn thingis that towchen me and the | |
| | I wil it telle the & non othir man certayn | |
| 310 | This carpenter goth doun & comyth agayn | |
| | And broughte of mighty ale alarge quart | |
| | And when eche of hem hadde dronke his part | |
| | This Nicholas his dore faste shette | |
| | And doun the carpenter be hym he sette | |
| 315 | He sayde Iohn myn hoost leue and dere | |
| | Thou shalt vp on thy trouthe swere me here | |
| | That to no wight thou shalt this counsel wrey | |
