| | Yet shal I saue here and the and me | |
| | Hast thou not herd how saued was Noe | |
| | Whan that our lorde hadde warned hym beforn | |
| 350 | That al the worlde with water sholde be lorn | |
| | Yes quod this carpenter ful yore ago | |
| | Hast thou not herd quod Nicholas also | |
| | The sorow of Noe with his feleship | |
| | Or that he mighte gete his wyf to ship | |
| 355 | Hym hadde leuer I dar wel vndertake | |
| | At that tyme than alle his wetheris blake | |
| | That she hadde had a ship her self alone | |
| | And therfore wotist thou what is best to done | |
| | This askith haste and of an hasti thing | |
| 360 | May men not preche ne make taryyng | |
| | Anon go gete vs faste in to this in | |
| | A knedynd trowgh or ellis a kemelyn | |
| | For eche of vs but loke that they be large | |
| | In whiche we mowe swymmen as in a barge | |
| 365 | And haue therynne vitayl sufficiaunt | |
| | But for o day fy on the remenaunt | |
| | The water shal a slake and go away | |
| | Aboute pryme vp on the nexte day | |
| | But robyn may not wite of this thy knaue | |
| 370 | Ne eke thy mayden gille I may not saue | |
| | Axe not why for though thou aske me | |
| | I wil not telle goddis pryuyte | |
| | It suffisith the but yf thy wit be mad | |
| | To haue as gret a grace as Noe had | |
| 375 | Thy wyf shal I wel saue out of doute | |
