| | Go now thy wey and speed the here aboute | |
| | But whan thow hast for the and her and me | |
| | Y goten thyse knedyng tubbis thre | |
| | Than shalt thou honge hem in the roof ful hye | |
| 380 | That noman of our pryuyte aspye | |
| | And whan thou thus hast don as I haue seyd | |
| | And hast our vitayl fayre in hem y leyd | |
| | And eke and axe to smyte the corde a two | |
| | Whan that the watir cometh that we may go | |
| 385 | And breke an hool an high vpon the gabyl | |
| | Into the gardeyn ward ouer the stabyl | |
| | That we may frely passe forth our way | |
| | Whan that the grete shour is passid away | |
| | Than shul we swymme as merily I vndertake | |
| 390 | As doth the whyte doke aftir the drake | |
| | Than wyl I clepe how alison how Iohn | |
| | Be mery for the flood wyl passe anon | |
| | And thow wilt say hayl maister Nicholay | |
| | Gode morow I se the wel for it is day | |
| 395 | And than shal we be lordis al our lif | |
| | Of al the worlde as Noe and his wyf | |
| | But of o thing I warne the ful right | |
| | Be wel auisyd on that ilke nyght | |
| | When we be entred in to the ship bord | |
| 400 | That none of vs speke no word | |
| | Ne clepe ne crye but be in his prayere | |
| | For it is goddis owen hest dere | |
| | Thy wyf and thow must hang fer a twyn | |
| | For that betwix you shal be no synne | |
