| 405 | Nomore in lokynge than ther shal in dede | |
| | This ordenaunce is do O god the spede | |
| | To morow at nyght when folk be alle a slepe | |
| | Into our knedyng tubbis wyl we crepe | |
| | And sittyn there abydyng goddis grace | |
| 410 | Go now thy wey and haue ne lenger space | |
| | To make of this no lenger sermonyng | |
| | Men sey thus send the wyse & say no thing | |
| | Thou art so wyse it nedith the not to teche | |
| | God saue our lif and I the beseche | |
| 415 | This sely Carpenter goth forth his weye | |
| | And to noman wold he hit be wreye | |
| | But to his wyf he tolde this priuyte | |
| | And she was waar and knew it bet than he | |
| | What al this queynte cast was for to seye | |
| 420 | But natheles she ferde as she wolde deye | |
| | And sayde alas go forth thy wey anon | |
| | Help vs to scape or we be ded echone | |
| | I am thy trewe weddid wyf | |
| | Go dere spouse and help to saue our lyf | |
| 425 | Lo whiche a gret thing is affection | |
| | Men may dye al day of ymaginacion | |
| | So depe may impression be take | |
| | This sely Carpenter begynneth to quake | |
| | Hym thynketh verily that he may se | |
| 430 | Noes flood come walowyng as the se | |
| | To drenchen alison his hony dere | |
| | He wepith waylith and maketh sory chere | |
| | He sighed with many a sory swough | |
