| | He goth and getith hym a knedyng trough | |
| 435 | And aftir that a tub and a kemelyn | |
| | And pryuely he sent hem to his in | |
| | And heng hem in the roof in pryuyte | |
| | With his owen hond he made laddres thre | |
| | To clymben be the rengis and the stalkis | |
| 440 | Into the tubbis hangyng in the balkis | |
| | And hem vitaylith bothe trough and tub | |
| | With breed and chese & good ale in a Iub | |
| | Suffising right I now as for o day | |
| | But or that he hadde maad al that aray | |
| 445 | He sente his knaue and eke his wenche also | |
| | Op on his erond to london forto goo | |
| | And on the sonday when it drew to nyght | |
| | He shitte his dore withoute candel light | |
| | And dressid al thing as it sholde be | |
| 450 | And shortly vp they clomben alle thre | |
| | They sittyn stille wel a furlong waye | |
| | Now pater noster clum sayde Nicholaye | |
| | And clum sayde Iohn and clum sayde alison | |
| | This Carpenter sayde his deuocion | |
| 455 | And stylle he sittith and biddith his praiere | |
| | Awaytyng on the rayn yf he it here | |
| | The ded sleep for very werynesse | |
| | Fyl on this Carpenter right as I gesse | |
| | Aboute curfu tyme or litil more | |
| 460 | For traueyl of his gost he gronyth sore | |
| | And eft he rowtith for his hed mys lay | |
| | Doun of the ladder stalkith Nicholay | |
