| | To alison now wol I tellen al | |
| | My loue longinge for yet I shal not mys | |
| | That at the leste wey I shal her kys | |
| 495 | Som maner comfort shal I haue perfay | |
| | My mouth hath icched al this longe day | |
| | That is a signe of kissinge at the leste | |
| | Al nyght y mette eke that I was at a feste | |
| | Therfore y wyl go slepe an hour or tweye | |
| 500 | And al the nyght than wyl I walke & pleye | |
| | Whan that the firste cok hath crowe anon | |
| | Vp risith this ioly louer absolon | |
| | And hym arayeth gay at poynt deuyse | |
| | But first he shewith grayn and licoryse | |
| 505 | To smellen swete or he hadde kempt his heer | |
| | Vnder his tong a trew loue he beer | |
| | For therby wende he to haue be gracious | |
| | He rometh to the Carpenteres hous | |
| | And stille he stont vnder the shot wyndow | |
| 510 | Vnto his brest it raught it was so lowe | |
| | And softe he knocketh with a semysoun | |
| | What do ye honycombe swete alson | |
| | My feyre birde my swete synamome | |
| | Awaketh lemman com and speke tome | |
| 515 | Ful lityl thynke ye vp on my woo | |
| | That for your loue y swete there I goo | |
| | No wonder is though I swelte and swete | |
| | I morne as doth a lamb aftir the tete | |
| | I wys lemman y haue suche loue longynge | |
| 520 | That lik a turtil trewe is my mornynge | |
