| | I may not ete nomore than amayde | |
| | Go fro the wyndow Iacke fool she sayde | |
| | As helpe me god it wol not be combame | |
| | I loue another and ellis y were to blame | |
| 525 | Wel bet than the be Ihesu absolon | |
| | Go forth thy wey or I wol throwe a stoon | |
| | And let me slepe a twenty deuyl wey | |
| | Allas quod absolon and wel awey | |
| | That trew loue was euyr euel be set | |
| 530 | Than kis me syn it may be no bet | |
| | For Ihesus loue and for the loue of me | |
| | Wilt thou than go thy wey there with qd she | |
| | Ye certis lemman quod this absolon | |
| | Than make the redy quod she I come anon | |
| | And vnto Nicholas she sayde stille | |
| | Now pees and thou shalt lawghe al thy fille | |
| 535 | This absolon doun set hym on his knees | |
| | And sayde y am a lord at al degrees | |
| | For aftir this y hope ther comyth more | |
| | Lemman thy grace and swete bryd thyn ore | |
| | The wyndowes she vndoth and that in haste | |
| 540 | Haue do quod she com of and spede the faste | |
| | Lest that our neyghebouris the a spye | |
| | This absolon gan wype his mouth ful drye | |
| | Derk was the nyght as piche or cool | |
| | And at the wyndow she put out her hool | |
| 545 | And absolon hym felte ne bet ne wers | |
| | But with his mouth he kist her ers | |
| | Ful sauerly or he were war of this | |
