| | The person of the toun hir fader was | |
| | With here he yaf many a panne of bras | |
| 25 | For that Symkyn sholde in his blood alye | |
| | She was fostrid in a Nonnerye | |
| | For Symkyn wolde no wyse as he sayde | |
| | But yf she were wel y norisshid and amayde | |
| | To saue his astat of yemanrye | |
| 30 | And she was proud and pert as a pye | |
| | A ful feir sight was vp on hem two | |
| | An holiday beforn hir wolde he go | |
| | With his tipet ybounde aboute his hed | |
| | And she cam aftir in a gite of reed | |
| 35 | And Symkyn hadde hosen of the same | |
| | Ther durste no wight clepe hir but dame | |
| | Was non so hardy that wente be the way | |
| | That with hir durste onys rage or play | |
| | But yf he wolde be slayn of Symkyn | |
| 40 | With pauade or with knyf or bodekyn | |
| | For ielous folk ben parlous euermo | |
| | Algatis they wolde her wyuys wenten so | |
| | And eke also for she was somdele smotirlich | |
| | She was as dyne as watir in a dich | |
| 45 | And ful of hocour as a pismare | |
| | Here thoughte a lady sholde hir spare | |
| | What for hir kynrede and hir nortilrye | |
| | That she hadde lernyd in the Nonerye | |
| | A doughtir hadde they betwix hem two | |
| 50 | Of twenty yeer withoute ony mo | |
| | Sauynge a child that was of half yeer age | |
