| | In cradyl it lay and was a proper page | |
| | This wenche thicke and wel I growe was | |
| | With Camoys nose and yen grey as glas | |
| 55 | Buttokkis brode and brestis rounde & hye | |
| | But right fair was her heer I wyl not lye | |
| | The parson of the toun for she was feyr | |
| | In purpos was to make hir his heyr | |
| | Bothe of his catell and his mesuage | |
| 60 | And straunge he made it of hir mariage | |
| | His purpos was to bestowe here hye | |
| | Vnto sum worthy blood of auncetrye | |
| | For holy chirche godes muste be spendid | |
| | On holy chirche blood that is descendid | |
| 65 | Therfore he wolde his holy blood honoure | |
| | Though that holy chirche sholde deuoure | |
| | Gret sokyn hadde this myller out of doute | |
| | With whete and malt of al the lond aboute | |
| | And namely ther was a gret Colege | |
| 70 | Men clepith it the soler halle of Cambregge | |
| | There was her whete & ek hir malt I grounde | |
| | And on a day it happed in a stounde | |
| | Seek lay the Mauncipyl on amalady | |
| | Men wenden wisly that he sholde dy | |
| 75 | Fro whom this Myllers stale bothe whete & corn | |
| | An hundrid tyme more than he did beforn | |
| | For there before he stal but curteisly | |
| | But now he was a theef ful outrageously | |
| | For whiche the wardeyn chidde & made fare | |
| 80 | But therof set this Myllere not a tare | |
