| | He crakid bost and sayde it was not so | |
| | Than were ther pore clerkis two | |
| | That dueldyn in this halle of whiche I sey | |
| | Testyf they were and lusty forto pley | |
| 85 | And only for hir myrthe and reuelrye | |
| | Vp on the wardeyn bisily they crye | |
| | To yeue hem leue but a litil stounde | |
| | To go to the mylle & se her corn y grounde | |
| | And hardely they durste ley her necke | |
| 90 | The myllere sholde not stele half a pecke | |
| | Of corn be sleyghte or by force hem tene | |
| | And at the laste the wardeyn yaf hem leue | |
| | Iohn highte that on & aleyn highte that othir | |
| | Of a toun were they born that highte strodir | |
| 95 | Fer in the north I can not telle where | |
| | They makyn redy al hir owen gere | |
| | And on her hors the sackis cast anon | |
| | Forth goth aleyn the clerk and eke Iohn | |
| | With good swerd and with bokeler by her syde | |
| 100 | Iohn knew the wey hym nedid no gyde | |
| | And at the mylle the sak adoun he leith | |
| | Aleyn spak first al hayl Symond in feith | |
| | How farith thy faire doughter and thy wyf | |
| | Aleyn welcome quod Symkyn be my lyf | |
| 105 | And Iohn also what how what do ye here | |
| | Symond quod he by god nede hath no pere | |
| | Hym bus serue hym self that has no swayn | |
| | Or ellis he is a fool as clerkis sayn | |
| | Our mauncipyl I hope he wol be ded | |
