| | He lokith vp and doun til he hath founde | |
| 140 | Thise clerkis hors where they stood bounde | |
| | Behynde the mylle vnder a leef feel | |
| | And to the hors he goth faire and wel | |
| | He stripith of the bridyl right anon | |
| | And when the hors were loos they gan gon | |
| 145 | Toward the feld where wilde maris renne | |
| | Forth with with wehy thurgh thicke & thynne | |
| | This myllere goth ayen no word he seyde | |
| | But doth his note & with the clerkis pleyde | |
| | Til that her corn was feire & wel grounde | |
| 150 | And whan the mele is sackid and bounde | |
| | This Iohn goth forth & fynt his hors a weye | |
| | And gan to crye harow and wel a wey | |
| | Our hors is lorn aleyn for cokkys banys | |
| | Step out on thy feet com thennys at anys | |
| 155 | Allas our wardeyn hath his palfrey lorn | |
| | This aleyn al forgat bothe mele and corn | |
| | Al was oute of mynde his husbondry | |
| | What whilk wey is he gon he gan crye | |
| | The wyf com rennynge ynward at a renne | |
| 160 | She said allas your hors goth to fenne | |
| | With wilde maris . as faste as he may go | |
| | Vnthank come on his hand that bond hem so | |
| | And he that bettir sholde haue knyt the reyne | |
| | Allas quod Iohn allas for cristis peyne | |
| 165 | Ley doun thy swerd and I wil myn alswa | |
| | I is ful swifte . god woot as is a raa | |
| | Be cockis herte he shal not a scape vs bathe | |
