| | Why ne had thou put the capyl in to the lathe | |
| | Ille hayl be god aleyn thou is a fonne | |
| 170 | These sely clerkis haue wel faste y ronne | |
| | Toward the fenne bothe aleyn and eke Iohn | |
| | And when the Myllere saw they were goon | |
| | He half a busshel of her corn hath take | |
| | And bad his wyf go knede it in a cake | |
| 175 | And sayde I trow the clerkis were a ferd | |
| | Yet can a Myllere make a clerkis berd | |
| | For al her art yet let hem go her wey | |
| | Lo where they goon so lat the children pley | |
| | They gete hem nought so lightly be my croun | |
| 180 | Thyse sely clerkis rennyn vp and doun | |
| | With kepe kepe stond stond Iossa ware derere | |
| | Ga whistle thou there and I shal kepe hym here | |
| | But shortly til it was verily nyght | |
| | They coude not though they dede al her myght | |
| 185 | Her capil cacche he ran alwey so faste | |
| | Tyl in a diche they caughte hym at the laste | |
| | Wery and weet as beste is in the rayn | |
| | Comyth sely Iohn and with hym aleyn | |
| | Allas quod Iohn the day that I was born | |
| 190 | Now are we dryuen to hething and to scorn | |
| | Our corn is stole men wyl vs folis calle | |
| | Bothe the wardeyn and our felowis alle | |
| | And namely the Myller wel a wey | |
| | Thus pleyneth Iohn as he goth be the wey | |
| 195 | Toward the Mylle and bayard in his hond | |
| | The Myller sittyng be the fyre he fond | |
