| | And to the feste cristen men dresse | |
| | In general bothe yonge and olde | |
| 320 | There may men reuel and feste beholde | |
| | And deyntees mo than I can deuyse | |
| | But al to dere they boughte it er they ryse | |
| | O sodeyn wo that euer art successour | |
| | To wordly blis spreynt with bitternes | |
| 325 | The ende of our Ioy and of our wordly labour | |
| | Wo occupieth the fyn of our gladnesse | |
| | Herkyn this counsel for thy sikernesse | |
| | Vp on thy glad day haue in thy mynde | |
| | The vnwaar wo that comyth the behynde | |
| 330 | For shortly to telle at o word | |
| | The sowdan and the cristen euerichone | |
| | Been al to hewen and stiked at the borde | |
| | But it were only dame Custaunce allone | |
| | This olde Sowdonnes cursid crone | |
| 335 | Hath with her cursid frendis there don this dede | |
| | For she her self wolde al the contre lede | |
| | Ne there was Surreyn none that was conuertid | |
| | That of the counsel of the Sowdan wotith | |
| | That he nas al to hewen or he astertid | |
| 340 | And Custaunce haue takyn as they hotith | |
| | And in a ship steerles god it wotith | |
| | They haue her set and bid her lerne to saylle | |
| | Out of Surrye ayen in to Itaylle | |
| | A certeyn tresour that she thyder ledde | |
| 345 | And soth to sayn vitayl greet plente | |
| | They haue her yeue and clothis eek she had | |
