| | This fals knight that hath this treson wrought | |
| | Bereth hir in hond she hath do this thyng | |
| | But natheles there was gret mornyng | |
| | Among the pepyl and sayden they can gesse | |
| 525 | That she hadde not do so gret a wickednesse | |
| | For they haue seye here euyr so vertuous | |
| | And louyng hermegild right as her lyf | |
| | Of this baar witnesse euerich in that hous | |
| | Saue he that slow hermegild with the knyf | |
| 530 | This gentil kyng hath caught a gret motif | |
| | Of this witnesse & thoughte he wolde enquyre | |
| | Deppere in this caas and trowthe forto lere | |
| | Allas custaunce thou hast no champion | |
| | Ne fighte cans thou not so wel away | |
| 535 | But he that for our redempcion | |
| | Bond sathan and yet lith there he lay | |
| | He be thy strong champion this day | |
| | For but crist open myracle kithe | |
| | Withoute gilt thou shalt be slayn as swithe | |
| 540 | She sette hir doun on her knees & thus she sayde | |
| | Immortal god that sauedist susanne | |
| | Fro fals blame and thou mercyful mayde | |
| | Mary I mene doughtir of saint anne | |
| | Before whos child aungelis syng Osanne | |
| 545 | If I begiltles of this felonye | |
| | My socour be or ellis I shal dye | |
| | Haue ye not se sum tyme a pale face | |
| | Of hym that hath be lad in a prees | |
| | Toward his deth where he getith no grace | |
