| | And suche a colour in the knyghtis face chees | |
| | Men myghte knowe his face in all the prees | |
| | Among al the faces that was in that Route | |
| | So stant Custaunce and lokith here aboute | |
| | O quenes lynage whilom in prosperite | |
| 555 | Duchesse and ladyes euerichone | |
| | Haue som rowthe on hir aduersite | |
| | An Emperours doughter stont allone | |
| | She woot not to whom to make her mone | |
| | O ryal lady that stondist in this drede | |
| 560 | Fer ben thy frendes at thy greet nede | |
| | This Alla hath suche compassion | |
| | As gentil herte is fulfillyd of pyte | |
| | That from his yen ran the watir doun | |
| | Now hastely do fet a book quod he | |
| 565 | And yf that this knyght wol swere that she | |
| | Hath this woman slayn yet wyl we vs auyse | |
| | Whom that we wyl shal be our Iustise | |
| | A briton book writen with euangelies | |
| | Was fet and there on he swoor anon | |
| 570 | She gilty was and in the mene whyles | |
| | An hond hym smoot vp on the necke boon | |
| | That doun he fyl at onys as a stoon | |
| | And bothe his yen brest out of his face | |
| | In sighte of euery body of that place | |
| 575 | A voys was herd in general audience | |
| | And sayde thou hast disclaundryd giltlees | |
| | The doughter of holy chirche in high presence | |
| | Thus hast thou doon and yet I holde my pees | |
