| | Of this meruayll agast was al the prees | |
| 580 | As masid folk they stonden euerichon | |
| | For drede of wreche saue Custaunce alone | |
| | Greet was the drede and eke the repentaunce | |
| | Of hem that hadde wrong suspection | |
| | Vp on this sely Innocente Custaunce | |
| 585 | And for this mirakil in conclusion | |
| | And by Custaunces mediacion | |
| | The kyng and many another in that place | |
| | Conuertid was thankid be cristis grace | |
| | This fals knight was slayn for his vntrouthe | |
| 590 | By Ingement of the kyng alla hastely | |
| | And yet hadde Custaunce of his deth gret routhe | |
| | And aftir Ihesus of his mercy | |
| | Made alla to wedde hir solemly | |
| | This holy maiden that is so bright and shene | |
| 595 | And thus hath crist maad Custaunce a quene | |
| | But who was woful yf I shal nat ly | |
| | Of this weddyng but donygelde and nomo | |
| | The kyngis modir ful of tirannye | |
| | Her thoughte her cursid herte brast a two | |
| 600 | She nolde not her sone hadde so do | |
| | Her thoughte a despyt that he sholde take | |
| | So straunge a creature vnto his make | |
| | Me list not of the chaf ne of the stre | |
| | Make so long a tale as of the corn | |
| 605 | What sholde I telle of the ryalte | |
| | Of this mariage or whiche cors goth beforn | |
| | Who bloweth in a trompe or who in a horn | |
