| | The fruyt of euery tale is for to sey | |
| | They eet and drank daunce synge and pley | |
| 610 | They go to bedde as it is skyl and right | |
| | For though that wyuys be ful holy thyngis | |
| | They muste take in pacient a nyght | |
| | Suche maner necessaries as been plesingis | |
| | To folk that haue weddid hem with ringis | |
| 615 | And ley a litil her holynesse a syde | |
| | As for the tyme it may non other betyde | |
| | On here he begate a man child anon | |
| | And to a bisshop and to his Constable eke | |
| | He took his wyf to kepe when he is gon | |
| 620 | To scotlond ward his fomen forto seke | |
| | Now faire Custaunce that is so humble & so meke | |
| | So long is gon with childe in that stylle | |
| | She kepte her chambir abydyng cristis wyll | |
| | The tyme is come a man child she beer | |
| 625 | Mauricius at the fontstoone they hym calle | |
| | This Constabyl doth forth come a messanger | |
| | And wroot vnto this kyng þt clepyd was alle | |
| | How that this blisful tidingis is be falle | |
| | And othir thing whiche was nedeful to saye | |
| 630 | He takith his lettre and forth he goth his waye | |
| | This messanger to do his auauntage | |
| | Vnto the kynges moder ridith he swythe | |
| | And salueth here fayre in his langage | |
| | Madame quod he ye may be glad and blythe | |
| 635 | And thanken god an hundrid thousand sithe | |
| | My lady the quene hath child withouten doute | |
