| | To ioye and blisse of al this regne aboute | |
| | Lo here the lettres sealid of this thing | |
| | That I muste bere in al the haste I may | |
| 640 | Yf ye wil ought to your sone the kyng | |
| | I am your seruaunt bothe nyght and day | |
| | Dame donegelde answerde al this tym nay | |
| | But here al nyght I wol thou take thy rest | |
| | To morow I wol sey the what me leste | |
| 645 | This messanger drank sadly ale and wyne | |
| | And stolen were his lettres priuely | |
| | Out of his box whilis he slepte as a swyn | |
| | And countrefetyd was ful subtilly | |
| | Anothir lettre wrought ful synfully | |
| 650 | Vnto the kyng directyd of this matere | |
| | Fro his Constabil as ye may aftir here | |
| | The lettre spak the quene deliuered was | |
| | Of so horrible a fendly creature | |
| | That in the Castel non so hardy was | |
| 655 | There no while ony wighte myghte endure | |
| | The modir was an elphe be auenture | |
| | I comyn be charmes or be sorcerye | |
| | And euery wight hateth hir in companye | |
| | Wo was the kyng whan he this lettre had seen | |
| 660 | But to no wight he tolde his sorowis sore | |
| | But of his owen hond he wroot ayeen | |
| | Welcome the sonde of crist for euermore | |
| | To me that am lerned in this lore | |
| | Lord welcome be thy lust & thy pleasaunce | |
| 665 | My lust I put al in thy ordenaunce | |
