| | That fallen is in hethen lond eftsone | |
| | In poynt to spille as I shal telle you sone | |
| | Doun from the Castel comyth ther many a wight | |
| | To ganryn on this ship and on Custaunce | |
| 815 | But shortly fro the Castel on a nyght | |
| | The lordis Steward god yef hym myschaunce | |
| | A theef that hadde reyned our creaunce | |
| | Com in to the ship allone & sayde hou she sholde | |
| | His lemman be whether she wolde or nolde | |
| 820 | Tho was this wrecchid womman wo be gon | |
| | Her child cryde and she pitously | |
| | But blissed mary helpe her anon | |
| | For with her strogeling wel and myghtely | |
| | The theef fil ouer the bord al sodenly | |
| 825 | And in the se he dreynt for vengeaunce | |
| | And thus hath crist vnwemmyd kept custance | |
| | O foul lust of luxurye lo thyn ende | |
| | Not only that thou feyntist mannys mynde | |
| | But verily thou wolt his body shende | |
| 830 | Then of thy werk and thy lustis blinde | |
| | Is compleynynge hou many on may men finde | |
| | That nought for werk sumtyme but fole entent | |
| | To do this synne be othir sleyn or shent | |
| | How may this week womman haue the strengthe | |
| 835 | Here to defende ayens the renegat | |
| | O Golias vnmesurable of lengthe | |
| | How myghty Dauid made the so mate | |
| | So yong of armure and so desolate | |
| | How durste he loke vp on thy face | |
