The British Library Caxtons Online: Cx1, folio 93v

840	Wel may men seen it is but goddis grace
	Who yaf Iudith corage or hardinesse
	To sle Olofernes in his tent
	And to deliueren out of wrecchidnesse
	The pepyl of god I say to this entent
845	That right as god spirit and vigour sent
	To hem and saued out of myschaunce
	He sente strengthe & vigour vnto Custance
	Forth goth her ship thorow out þ^e naroue mouth
	Of Iubalter and septe driuyng ay
850	Som tyme west and som tyme north & south
	And somtyme est ful meny a wery way
	Til cristis moder y blissid be she ay
	Hath shapen thorow her endlees goodnesse
	To make an ende of al her heuynesse
855	Now lete vs stynte of Custance but a throw
	And speke of Romayns the Emperour
	That out of Rome hath be lettris knowe
	The slaughter of cristen folk and dishonour
	Doon vnto his doughter be a fals traytour
860	I mene the cursid and wickyd sowdonnesse
	That at the feste leet sle bothe more and lesse
	For whiche this Emperour hath sent anon
	His senatour with ryal ordenaunce
	And othir lordis god woot meny on
865	On surryens to take high vengeaunce
	They brenne & sle & brynge hem to myschaunce
	Ful meny a day but shortly this is the ende
	Homward to Rome they shapen hem to wende

In CTP line numbering:	ML, 840
In Group (Traditional) numbering:	Group B1, 938
In Fragment (Riverside) numbering:	Fragment II, 938

In CTP line numbering:	ML, 845
In Group (Traditional) numbering:	Group B1, 943
In Fragment (Riverside) numbering:	Fragment II, 943

In CTP line numbering:	ML, 850
In Group (Traditional) numbering:	Group B1, 948
In Fragment (Riverside) numbering:	Fragment II, 948

In CTP line numbering:	ML, 855
In Group (Traditional) numbering:	Group B1, 953
In Fragment (Riverside) numbering:	Fragment II, 953

In CTP line numbering:	ML, 860
In Group (Traditional) numbering:	Group B1, 958
In Fragment (Riverside) numbering:	Fragment II, 958

In CTP line numbering:	ML, 865
In Group (Traditional) numbering:	Group B1, 963
In Fragment (Riverside) numbering:	Fragment II, 963