| 985 | To vouchesauf sumtyme with hym to dyne | |
| | She praieth hym eek he sholde be no wey | |
| | Vnto hir fader no word of here sey | |
| | Sum men wolde seyn that the child Maurice | |
| | Doth this message vnto the Emperour | |
| 990 | But as I gesse alla was not so nyce | |
| | To hym that is so souereyn of honour | |
| | As he that is of cristis folk the flour | |
| | Sente ony childe but it is best to deme | |
| | He wente hym self and so it may wel seme | |
| 995 | This Emperour hath grauntid gentilly | |
| | To com to dyner as he hym besoughte | |
| | This alla was redy he lokyd bysily | |
| | Vp on this childe and on his doughter thoughte | |
| | Alla goth vnto his Inne and as hym oughte | |
| 1000 | Araid for this feste in euery wyse | |
| | As ferforth as his kunnynge may suffise | |
| | The morow cam alla gan hym dresse | |
| | And eke his wyf this Emperour for to mete | |
| | And forth they riden in ioye and in gladnesse | |
| 1005 | And when she saw her fader in the strete | |
| | She lightith doun and fallith hym to fete | |
| | Fader quod she your yonge child Custaunce | |
| | Is now ful cleen out of your remembraunce | |
| | I am your doughter Custaunce quod she | |
| 1010 | That whilom ye haue sent in to surrye | |
| | It am I fader that in the salt see | |
| | Was put alone and dampned forto dye | |
| | Now gode fader mercy I you crye | |
