| 180 | To voiden hym as ye shul aftir here | |
| | Greet was the prees that swermyd to & fro | |
| | To gawrin on the hors that stood so | |
| | For it so high was so brood & so long | |
| | So wel proporcioned to be strong | |
| 185 | Right as it were a stede of lumbardye | |
| | Therwith so horsly and so quyk of ye | |
| | As it a gentil polin courser were | |
| | For certis from his tayl vnto his ere | |
| | Nature ne art coude hym not amende | |
| 190 | In no degre as al the pepyl wende | |
| | But euermore her most wonder was | |
| | How that it coude go and was of bras | |
| | It was of feire as al the pepyl semyd | |
| | Dyuerse folk diuersly demede | |
| 195 | As meny hedes. as meny wittis ther been | |
| | They mormedyn as doth a swarm of been | |
| | And maken skillys aftir hir fantesie | |
| | Rehersynge of the olde poetrie | |
| | And sayde it was like the pegase | |
| 200 | The hors that hadde wyngis forto fle | |
| | Or ellis it was the grekis hors Symon | |
| | That brought grekis vnto destruction | |
| | As men in thyse olde gestis rede | |
| | Myn herte quod oon is euermore in drede | |
| 205 | I trow sum men of armys be therynne | |
| | That shape hem this cyte forto wynne | |
| | It were right good þt al suche thing were knowe | |
| | Another rowned to his felow lowe | |
