| 690 | That I was betyn for a book parde | |
| | Vp on a nyght Iankyn that was our syre | |
| | Radde on his book as he sat be the fyre | |
| | Of Eue first that for hir wickednes | |
| | Was al mankynde brought to wrecchidnes | |
| | For which that Ihesu crist hym self was slayn | |
| | That boughte vs with his herte blood agayn | |
| | Lo here expres of women may ye fynde | |
| | That woman was the los of al mankynde | |
| 695 | To redde he me how Sampson loste his heris | |
| | Slepinge his lemman kit hem with her sheris | |
| | Thorough whiche treson lost he bothe his yen | |
| | Tho radde he yf that I shal not lyen | |
| | Of Hercules and of Dyanyre | |
| 700 | That causith hym to sette hym self a fyre | |
| | No thyng forgat he the sorow and the woo | |
| | That Socrates hadde with his wyuys two | |
| | How Exantippa cast pisse vp on his hed | |
| | This sely man sat stille as he were ded | |
| 705 | He wipid his hed no word durste he sayn | |
| | But or the thunder stynte comyth rayn | |
| | Of Philip that was the quene of Crete | |
| | For shrewdnesse hym toughte it swete | |
| | Fy spek no more it is a grisly thing | |
| 710 | Of her horrible lust and of her likyng | |
| | Of Cletemystra for her high lecherye | |
| | That fasly made her husbond to dye | |
| | He redde it with ful good deuocion | |
| | He tolde me eke for what conclusion | |
