| | What sume sholde the maistris guerdom be | |
| | To remeue alle the rockis in Britaigne | |
| | And eek from geronde to the mouth of sayne | |
| 515 | He made hym straunge he swoor so god hym saue | |
| | Lesse than a thousand pound he wolde not haue | |
| | Ne gladly for that sume he nolde not goon | |
| | Aurilius with blisful herte anon | |
| | Saith thus fy on a thousand pound | |
| 520 | The wyde worlde whiche men say is rounde | |
| | I wolde it yeue yf I were lord of it | |
| | This bargayn is ful dryue and ful knyt | |
| | Ye shul be paid trewly be my trouthe | |
| | But lokith now for noon negligence ne slouthe | |
| 525 | Ye tarye vs here no lenger than to morow | |
| | Nay quod the clerk haue here my feith to borow | |
| | To bedde he goth Aurilius whan hym lest | |
| | And wel nygh al that nyght he hadde rest | |
| | What for his bargayn and for his hope of blisse | |
| 530 | His woful herte of penaunce hadde a lisse | |
| | Vp on the morow whan it was day | |
| | To Britayne took they the righte way | |
| | Aurilius and this Magicien hym beside | |
| | And be descended there they wol abyde | |
| 535 | And this was as the book doth remembre | |
| | The cold frosty seson of decembre | |
| | Phebus hewe wexid was lik latoun | |
| | That a fore in his hoot declinacioun | |
| | Shone as the buruyd gold with stremys bright | |
| 540 | But thenne in Capricorne a doun he light | |
