| | Whan he was in this worlde declarid here | |
| | That ther is other lyf there men may woon | |
| | To whom answerde Tiburce o sustir dere | |
| | Ne seydist thou right now in this manere | |
| 335 | Ther nas but o god lord in sothfastnes | |
| | And now of thre how maist thou bere witnes | |
| | That shal I telle quod she or that I go | |
| | Right as a man hath sapiences thre | |
| | Memorye engeny and intellect also | |
| 340 | So in suche beynge of dyuinyte | |
| | Thre persones may ther right wel be | |
| | Tho gan she there ful bisily hym preche | |
| | Of cristis son and of his peynes teche | |
| | And many poyntis of his passion | |
| 345 | How goddis sone in this worlde was witholde | |
| | To do mankynde pleyn remission | |
| | That ben bounde in synnys and caris colde | |
| | Alle thyse thingis she vnto Tiburce tolde | |
| | And aftir this Tiburce in good entent | |
| 350 | With Valerian to Pope Vrban went | |
| | That thankid god & with glad herte & light | |
| | He cristned hym and made hym in that place | |
| | Parfit in his lernyng goddis knyght | |
| | And aftir this Tiburce gat suche grace | |
| 355 | That euery day he saw in tyme and space | |
| | The aungel of god and euery maner bone | |
| | That he god axid it was sped ful sone | |
| | It were ful hard be ordir forto seyn | |
| | How many wondris Ihesus for hym wrought | |
