| 360 | But atte laste to telle short and pleyn | |
| | The sergeauntis of the toun hem sought | |
| | And hem before almache the Prefect broughte | |
| | Whiche hem apposid and knew al her entent | |
| | And to the ymage of Iubiter hem sent | |
| 365 | And sayde who so wil do no sacrifise | |
| | Swap of his hed this is my sentence here | |
| | Anone thyse martirs that I you deuyse | |
| | One Maximus that was an officere | |
| | Of the Prefectis and his Councelere | |
| 370 | Hem hent and the sayntis forthledde | |
| | Hym self he wepte for pyte that he hadde | |
| | When Maximus had herd the sayntis lore | |
| | He gat hym of the turmentours leue | |
| | And hadde hem to his hous withouten more | |
| 375 | And with her prechinge or it were eue | |
| | They gonne fro the turmentours forto reue | |
| | And fro Maxime and fro his folk echone | |
| | The fals feith to trowe in god allone | |
| | Cecily cam when it was woxe nyght | |
| 380 | With preestis that hem cristned alle in fere | |
| | And afterward whan day was woxen light | |
| | Cecily sayde hem with a ful stedfast chere | |
| | Now cristis owen knyghtis leef and dere | |
| | Cast al awey the workis of derknesse | |
| 385 | And arme you with armys of brightnesse | |
| | Ye haue forsoth ydon a gret bataylle | |
| | Your cours is doon your feith hath you conserued | |
| | Goth to the croune of lif that may not faylle | |
