| | An hundrid mark syn I was pardoner | |
| | I stonde lik a clerk in many a Pulpet | |
| | And shewe lewd pepyl and doun they set | |
| 65 | I preche so as ye haue herd before | |
| | And telle an hundrid Iapis more | |
| | Than peyne I me to strecche forth myn necke | |
| | And est and west vp on the pepyl I becke | |
| | As doth a dowue sittynge vpon a bern | |
| 70 | Myn hondis and my tonge gon so yern | |
| | That it is ioye to se my besines | |
| | Of auarice and suche cursidnes | |
| | Is al my prechinge to make hem fre | |
| | To yeue her pens and namely vnto me | |
| 75 | For myn entent is not but forto wynne | |
| | And no thing for correction of synne | |
| | I recke not when that they be beried | |
| | Though her soulis goon a blakeberied | |
| | For certis many a predicacion | |
| 80 | Sowneth ofte tyme of euyentencion | |
| | Some for plesaunce of folk and for flaterye | |
| | To ben auauncid be ypocrisie | |
| | And som for veynglory and som for hate | |
| | For when I dar not other whyle debate | |
| 85 | Than wol I stynge hem with my tonge smerte | |
| | In prechinge so that they shul not asterte | |
| | To ben diffamed falsly yf that he | |
| | Hath trespassid othir to my bretheryn or me | |
| | For though I telle not his proper name | |
| 90 | Men shal wol knowe it is the same | |
