| | And sayde allas for in an oxes stalle | |
| 185 | This nyght shal I be murdrid there I ly | |
| | Now help me dere brother or I dy | |
| | In alle haste com to me he sayde | |
| | This man out of his slepe for feer abreyde | |
| | And whanne he was wakid of his slepe | |
| 190 | He turned hym and took of this no kepe | |
| | Hym thoughte his dreme was but a vanyte | |
| | Thus twyse in his slepe dremyd he | |
| | And atte thridde tyme yet his felaw | |
| | Cam as hym thoughte & sayde I am now slawe | |
| 195 | Behold my blody woundis depe and wyde | |
| | Aryse vp erly in the morow tyde | |
| | And atte west gate of the toun quod he | |
| | A cartful of dung there shalt thou se | |
| | In whiche my body is hid ful pryuely | |
| 200 | Do that carte areste boldely | |
| | My gold causid my deth soth to sayn | |
| | And tolde hym euery poynt how he was slayn | |
| | With a ful pitous face pale of hewe | |
| | And trust wel his dreme he fond right trewe | |
| 205 | For on the morow as sone as it was day | |
| | To his felowis yn he took the way | |
| | And whenne that he cam to the oxis stalle | |
| | Aftir his felow he gan to calle | |
| | The Osteler answerd hym anon | |
| 210 | And sayde sire your felow is goon | |
| | As sone as day he wente out of the toun | |
| | This man gan fallyn in suspessioun | |
