| | Remembryng of his dremys that he mette | |
| | And forth he goth no lengir wolde he lette | |
| 215 | Vnto the westgate of the toun and fond | |
| | A dong carte as it were to donge londe | |
| | That was arayd in the same wyse | |
| | As ye haue herd the ded man deuyse | |
| | And with hardy herte he gan to crye | |
| 220 | Veniaunce and Iustice of this felonye | |
| | My felow murdrid is this same nyght | |
| | And in this carte he lieth gapyng vp right | |
| | I crye out on the mynistres quod he | |
| | That sholde kepe and reule this cyte | |
| 225 | Harow allas here lieth my felow slayn | |
| | What sholde y more of this tale sayn | |
| | The pepyl out sterte & cast the carte to grounde | |
| | And in the myddel of the dong they fonde | |
| | The ded man that murdrid was al newe | |
| 230 | O blesful god that art so good and trewe | |
| | Lo how that thow bewreyest murdir alwey | |
| | Murdir wol out that se we day be day | |
| | Murdir is so waltsom and abhomynabyl | |
| | To god that Iust is and resonable | |
| 235 | That he ne wol it suffre helyd to be | |
| | Though it abyde aday or two or thre | |
| | Murdir wol out this is my conclusion | |
| | And right anon the mynystris of the toun | |
| | Haue hent the carter & so sore hym pyned | |
| 240 | And eke the Osteler so sore engyned | |
| | That they beknew hir wickydnesse anon | |
