| | For sweuenys be but vaintees and Iapes | |
| | Men metyn alday of owlis and of apes | |
| | And of many amase therwith al | |
| | And dremyn of thing that neuir was ne shal | |
| 275 | But sith I se that thou wolt here abyde | |
| | And thus slouthen wilfully thy tyde | |
| | God woot it rewith me and haue good day | |
| | And thus he took his leue & wente his way | |
| | But er he hadde half his cours ysayled | |
| 280 | I not why ne what myschaunce it aylyd | |
| | But casuelly the shippis botom to rent | |
| | And ship and man vnder the watir it went | |
| | In sighte of othir shippis besyde | |
| | That with hym sayled atte same tyde | |
| 285 | And therfore faire Pertelot so dere | |
| | By ensamplis olde maist thou here | |
| | That noman sholde be to recheles | |
| | Of dremys for I say the dontles | |
| | That many a dreme ful sore is forto drede | |
| 290 | Lo in the lyf of saint Kenelme I rede | |
| | That was Kenulphus sone the nobil kyng | |
| | Of mereturik how kenelme mette a thing | |
| | A lityl or he were mordrid on aday | |
| | His mordir in his vision he say | |
| 295 | His norice hym expouned it eueridell | |
| | His sweuyn and bad hym kepe hym wel | |
| | Fro treson but he was but . vij . yeer old | |
| | And therfore lityl tale he hath therof told | |
| | Of ony dreme so holy ws his herte | |
