| 300 | Be god I hadde leuyr than my sherte | |
| | That ye hadde herd his legend as haue I | |
| | Dame Pertelot I say to yow trewly | |
| | Macrobius that writtith the visioun | |
| | In his book of the dremes of scipioun | |
| 305 | Affermyth dremys and saith that they been | |
| | Warnyng of thingis that we aftir seen | |
| | And ferthermore I pray yow lokith wel | |
| | In the olde testament of daniel | |
| | Yf he held dremys ony vainte | |
| 310 | Rede eke of Ioseph and there shul ye se | |
| | Wondris ben som tyme but I say not al | |
| | Warnyng of thingis that shul aftir fal | |
| | Lo of Egipt the kyng that hight Pharao | |
| | His baker and eke his boteler also | |
| 315 | Whethir they felt non effect in dremys | |
| | Who so wol seke actis of sondry remys | |
| | May rede of dremys a wondir thing | |
| | Lo Cresus whiche was of lide kyng | |
| | Mette he not that he sat vp on a tre | |
| 320 | Which signified he sholde hangid be | |
| | Lo Andrometa Hectors wif | |
| | That day that Hector sholde lese his lif | |
| | She dremyd in the same nyght beforn | |
| | How that the lif of Hector shold be lorn | |
| 325 | Yf that day he wente vn to bataille | |
| | She warned hym but it might not auaylle | |
| | He wente forto fighte natheles | |
| | But he was slayn anone of Achilles | |
