| | But that tale is to longe to telle | |
| 330 | And eek it is nygh day I may not dwelle | |
| | Shortly I say as for conclusion | |
| | That I shal haue of this avision | |
| | Aduersite and I say furthermore | |
| | That I ne telle of laxatiuis no store | |
| 335 | For they be venemous I woot it weel | |
| | I hem diffye I loue hem neuyr adeel | |
| | But now lete vs speke of mirthe & stynt al this | |
| | Madame Pertelot so haue I blis | |
| | Of o thing god hath me sent large grace | |
| 340 | For when I see the beaute of your face | |
| | Ye be so skarlet reed aboute your yen | |
| | It maketh al my drede forto dien | |
| | For also sikir as in principio | |
| | Mulier est hommis confusio | |
| 345 | Madame the sentence of this latyn is | |
| | Womman is mannys Ioie and his blis | |
| | For when I fele an nyght your softe syde | |
| | Al be it that y may not on you ryde | |
| | For that our perche is made so narow allas | |
| 350 | I am so ful of ioye and of solas | |
| | That y diffye bothe sweuene and dreme | |
| | And with that word he fley doun fro the beem | |
| | For it was day and eek his hennys alle | |
| | And with a chuk he gan hem doun calle | |
| 355 | For he had founde a corn lay in the yerde | |
| | Ryal he was and nomore a ferde | |
| | He federyd Pertelot twenty tyme | |
